Mein Resumé
Publiziert am | 22 August 2011 | Kommentare deaktiviert
Hoi mitenand
Also jetzt bin doch echo widär einigi Täg zrugg i dä schöne (vorallem zur Ziit heisse!) Schwiiz und han mir denkt ich nime jetzt einigi Minute Ziit (eigentlich sötte jo für mini Prüefig lärne…), damit ich eu es versprochene Resumé liefere chan. Erschtmol muessi säge es sich um einiges bequemer und vorallem schneller en Blogitrag mitere “normale” PC-Tastatur z`verfasse als mit dä chline Touch-Tastatur vomene iPhone 
, was aber nid sötte bedüte, dass min Itrag ellenlang sötti wärde.
Also wenni jetzt zrugg uf diä drü Wuchene uf dere Inlse us Füür und Iis inmitten vom Nordatlantik tuen luege, muessi feschtstelle, dass ich villicht echli zu grossi Erwartige gha han (jo das isch aber au keis Wunder wenn alli wo scho mol en Bsuech döt ane gmacht hend, in volle Züge tüend schwärme!). Das heisst aber nid, dass ich mega enttüscht gsi bin und es mir nid gfalle hett. Was mich definitiv echli gnervt het isch es struube Wätter (Duurräge, starche Wind, chalti Temperature und Sandsturm), ok hetti villicht au demit müesse rächne, wenn mer in Norde ufe goht, aber han ebe nid sone hartnäckigi Beständigkeit vo schwierigem Wätter erwartet. Es Föteli isch dementsprechend sehr schwierig gsi und hett au nid eso Spass gmacht, well erschtens isch es bi Räge und Wind sehr schwierig d`Linse troche z`bhalte, damit mer kei Tropfe uf dä Föteli gseht, denn isch d`Liechtstimmig au nid grad sehr vorteilhaft, well d`Farbe vo dä Landschaft nid grad betont wärdet.
Ah jo do chume also grad zu mim nöchste Punkt, wo mir ufgfalle isch und mich ächli enttüscht hett und zwor d`Farbe, wo schlicht und eifach i däre Landschaft nid würklich sehr zahlriich vorhande gsi sind. Das hett vorallem dämit z`tue, dass diä Landschaft sehr jung isch und vo Vulkän gschaffe worde isch, das heisst, dass d`Vegetation (also es hett fascht kei Bäum oder Blüemli gha) und au d`Flora (viel Tier hemmer au nid grad zur Sicht becho) sehr dünn gseiht gsi isch. D` Hauptfarbtön sind “Braun” (Bärge), “Schwarz” (Vulkangstei) und “Weiss” (Gletscher und Meer) gsi. Es chan au dra gläge ha, dass ebe d`Sunne villicht eifach gfählt hett, well wie scho erwähnt macht das en entscheidene Unterschied! Aber dennoch muessi sägä dass d`Landschaft emol abgseh vo dä Farbeprächtigkeit, sehr interessant gsi isch mit däne verschiedene Arte und Forme.
Vo üsem Reiseprogramm her muessi sägä, dass mir eigentlich sehr viel gseh hend und fascht alles eso klappet hett wiä mir das denkt hend. Au d`Kombination mit Mietauto (2 Wuche) und öffentliche Vercher (1 Wuche) hett sich als sehr geeignet usegstellt. Wägem Zelte chani nume sägä, dass i mega stolz bin uf mis Zelt, es hett dem schlechte Wätter trotzt und Räge und Sturm hett em nüt chönne aha, dennoch isch es nid unbedingt gmüetlich gsi (ächli chüel und han jo mis Ruggeproblem au no müesse irgendwie löse -> Luftmatratze) und au ächli umständlich (z.B. Zeltauf- und -abbau). D`Körperpfleg hett eigentlich meischtens guet funktioniert , well wiä ihr scho amigs glese hend simmer jo sehr oft i Thermalbäder gsi und das muessi sägä hett mir amigs sehr guet gfalle (“während es dusse chalt isch und rägnet, im bis 35 Grad heisse Wasser z`sitze).
Dä Punkt mit dä Verpflägig isch eigentlich au relativ guet lösbar gsi, klar es isch mängsmol nid grad eifach gsi mitem Gaschocher bi starchem Wind und eher sehr igschränktem Chochmaterial öpis Schlaus anezbringe. Verhungeret simmer aber nid, und mängsmol simmer jo sogar in es Reschti gflüchtet, was vo dä Priise her eigentlich gar nid eso viel tüürer gsi isch als selber go poschte! Au do bini sehr z`friede mit em vorher extra kaufte Equipment, sprich Gaskocher und Pfanneset (ah jo weissi gar nid öbi das scho mol erwähnt gha han, aber es Abwäsche hett sich au echli anders erwiese als bi üs, well es Fätt vom Gschirr isch trotz heissem Wasser und Abwäschmittel sehr schlecht wäggange – denkt, das hett demit ztue, well es Wasser dört kei Kalk drin hett (geologisch bedingt…)).
Denn möcht ich no amerke, dass es zwor bi dä Hotspots vo Sightseeingpünkt amigs sehr viel anderi Touriste gha hett, aber sobald mer einigi Meter selber under d`Füess gnoh hett isch mer sehr bald seeleallei gsi. Also gar nid z`vergliche mit em Schwiizer Mittelland, well es hett eigentlich überhaupt kei Spure geh vo Zivilisation i dere Vulkanlandschaft (isch jo au verständlich bi dessen karge Charakter) – das hani sehr idrücklich und cool gfunde!
Würklich Kontakt zu anderne Lüüt hett mer nid würklich becho. Ich denk do sind zwei Hauptgründ verantwortlich und zwor isch mer bi dem schlechte Wätter sehr oft früeh im Bett bzw. eigene Zelt gsi und hett somit kei anderi Lüüt troffe und zweitens simmer jo eher weniger mitem ÖV (es fählt für mich eifach es Eisenbahnnetz – dört trifft mer viel Lüüüt!) underwägs gsi, sondern mit em PW. Au dä Kontakt zu Iheimische isch sehr schwierig gsi, diä läbät jo hauptsächlich i dä Städt und nid uf em Land und diä meischte Sehenswürdigkeit sind jo ebe dört gsi uf em Land.
So jetzt nochdem ich echli viel Kritik gschribä han (ich hoffe ich han eu nid irgendwie devo abghalte selber dört anezreise…), möcht ich zum Schluss no mini Highlights erwähne. Was ich mega lässig gfunde han isch d`Umgebig vo Skaftafell, well dört hetts ganz viel verschiedeni Sache (farbigi Bärge, Gletscher, Sanderflächene, Meer usw.) amene einzige Ort gha, ok glaub es guete Wätter hett do sicher au en entscheidene Ifluss gha uf mis Empfinde. Denn was mir au sehr gfalle hett sind diä farbige Thermalhügel um dä See “Myvatn” – ok au do hett ä schöni Obigsstimmig mit Sunne gherrscht. Und denn natürlich no diä Hügellandschaft vo Landmannalaugar – bin gottefroh, dass mir do doch no öpä 3 Stunde Sunne gha hend, bevor dä Sandsturm agfange hett.
Än sehr spezielle Moment isch au üsen Usflug uf d Insle “Hrisey”, also do isch d`Landschaft würklich hammer schön gsi – grüeni Wisä, einigi Blüemli, viel Vögel, dunkelblaue Fjord, schneebedeckti Bärge und strahlendblaue Himmel! Ich denke dört sind au einigi vo mine beschte Schnappschüss mit dä Kamera entstande. Tja mängsmol sinds halt nid grad diä touristischte Pünkt, wo eim gfalled…
So genug der Worte, dä Itrag sprängt jo scho fascht dä Rahme vomene Blog. Das wär also mini erschti würklichi Reis in hohe Norde gsi, ich denke trotz dem eher echli kritische Resumé, wird au eini vo mine nöchschte Reise villicht widär Richtig Norde goh, mol luege, han do scho mol ä Idee
Schaffhausen, 22.08.2011
Pascal
PS: Was i jetzt no vergässe han z`sägä isch, dass es halt sehr schwierig gsi isch, amigs dusse z`blibä bi dem Wätter, well am bequemschte und wärmschte isch es doch denn im Zelt gsi und ich denke so händ mir villicht au einigi Sache verpasst (z.B. Mitternachtssunne, oder so..).
Kommentare
Meine Seiten
Meine letzten Artikel
Meine Webseiten
Umfrage
Loading ...